زمن الفروسه انتهى

شعر جمال الزغبى




زمن الفروسه انتهى




قالوا الكلام   ده  خطأ
قلت الكلام  ده أكيد
معدشى نخوة عرب
ومعدشى عزم حديد
أحسن طريقه الهرب
م  القوه والتهديد
زمن الفروسه انتهى
ومعدشى ( ابن وليد  )
معدشى الا امريكا
واحنا الرعايا عبيد
والعمر طفل اتولد
مولوده لسه جديد
كبرت علينا البلد
بفلوسنا  والتهليب
والنهب والتخريب



كل اللى اتملى كرشه
وفايض عليه قرشه
رايح يعينه بعيد
كان ماله بنك العرب
كان ماله يعلى يزيد
ناخد وندى لبعضنا
كل اللى فايض عندنا
ولا حد يبقى قدنا
والكل يسمع عننا
وإيدينا تبقى الف ايد
يبقى لنا كلمه   ف البلاد
ونبقى اقوى م الزناد
ونرجع الزمن المجيد